Figure 03

Robot i ri humanoid që ndoshta do t’i palosë peshqirët… një ditë 🤖

Figure AI ka prezantuar Figure 03, robotin e tyre të ri humanoid — dhe pritshmëritë janë, po, çuditërisht të larta. Synimi i kompanisë? Një robot që mund të bëjë detyra njerëzore, të mësojë drejtpërdrejt nga njerëzit dhe të funksionojë si në shtëpi, ashtu edhe në punë. Ndryshe nga modelet e mëparshme, Figure 03 është ridizenjuar nga e para si në hardware ashtu edhe në software.

Truri i robotit

Figure 03 është ndërtuar rreth Helix, Inteligjenca Artificiale (vision-language-action) e kompanisë. Për këtë arsye, roboti merr një paketë të re të sensorëve dhe kamerave: frame rate dyfish, latency një të katërtën, fushëpamje 60% më të gjerë dhe perceptim shumë më i mirë. Me këtë sistem të ri, roboti mund të ecë dhe të kalojë në ambiente të ngushta dhe të çrregullta — pra në shtëpinë e çdo shqiptari normal 😅.
Kamerat e vendosura në pëllëmbë i japin robotit “sy rezervë” edhe kur kamerat kryesore bllokohen, p.sh. kur futet në dollap për të marrë një pjatë.

Duart: më delikate se gjysma jonë në kuzhinë

Figure 03 ka duar të reja me sensorë taktilë tepër të ndjeshëm, që dallojnë shtypje deri në 3 gram — mjaftueshëm për të kuptuar nëse një objekt po i rrëshqet nga dora. Ky lloj kontrolli i imët i lejon robotit të mbajë sende delikate, të palosë rroba dhe të rregullojë objekte me forma të ndryshme pa i shqyer. (Imagjino robotin duke mbajtur një vezë — bukuri ose katastrofë, s’ka të mesme. 😂)

I menduar për shtëpinë

Roboti është më i lehtë se modeli i mëparshëm, me materiale të buta që e bëjnë më të sigurt për t’u përdorur rreth njerëzve. Ka bateri të certifikuar me standardet më të rrepta dhe një sistem audio më të qartë për komunikim natyral. "Veshja" e robotit mund të lahet dhe ndërrohet pa mjete.

Dhe pjesa më moderne: karikim wireless 2 kW.

Gati për prodhim masiv

Figure 03 është roboti i parë i kompanisë i ndërtuar për t’u prodhuar me mijëra njësi. Pjesët janë reduktuar, proceset janë optimizuar dhe është ngritur një zinxhir furnizimi i ri global. Objekti i prodhimit, BotQ, synon deri në 12,000 robotë në vit, me objektiv deri në 100,000 brenda katër viteve.
Ende jo gati për shtëpitë tona… por shumë afër...

Edhe pse Figure 03 ende ngec me peshqirët (si shumica prej nesh 😄), përparimi është i madh. Investimet janë rekord dhe ritmi i zhvillimit është më i shpejti ndonjëherë në robotikë.

A do kemi një robot që palos rrobat e shtëpisë brenda pak viteve? Shpresojmë.
A do na shpëtojë nga lavatriçja?  Shpresojmë akoma më tepër. 🙏🏻